Се одложува авиолинијата Скопје-Дубаи што беше најавена дека ќе се воведе од 30 март. Компанијата „ФлајДубаи“ доставила барање до Министерството за транспорт и врски за пролонгирање на линијата која беше дел од субвенционираните летови избрани на првиот повик на Владата.

„Во информацијата доставена до Министерството за транспорт се вели дека поради објективни причини кои не зависат од авиокомпанијата ‘ФлајДубаи‘ формално се бара пролонгирање на започнување на операција на линијата. Воедно, се вели дека ‘ФлајДубаи‘ е целосно посветена на воспоставување на оваа дестинација. Министерството за транспорт останува во континуирана комуникација со авиокомпанијата и целосно ги подржуваме нивните напорти за реализација на оваа дестинација“, велат од Министерството за транспорт и врски.

Од Министерството не кажаа до кога се бара одложување, односно кога ќе почне да функционира оваа авиолинија.

• НАПРОЛЕТ ОД СКОПЈЕ ЌЕ СЕ ЛЕТА И ЗА БАРСЕЛОНА, ЛИОН, ДУБАИ И ШТУТГАРТ, А ОД ОХРИД ЗА ИСТАНБУЛ И БАЗЕЛ, ЌЕ СЕ РАСПИШЕ И ВТОР ОГЛАС ЗА НОВИ АВИОЛИНИИ

• „ИЗИЏЕТ“ ДОБИ СУБВЕНЦИИ ЗА АВИОЛИНИИТЕ ОД СКОПЈЕ ЗА ЖЕНЕВА И ЗА ПАРИЗ – „ОРЛИ“

На првиот повик на Владата за субвенционирање на авиолинии во октомври 2024 беа избрани шест авиолинии на „Визер“, „Туркиш ерлајнс“ и „Флајдубаи“. „Визер“ ќе добие владина помош за летовите од Скопје до Барселона и Лион кои треба да стартуваат од мај 2025 и до Штутгарт од октомври 2025. „Туркиш ерлајнс“ од 27 март почна со летови меѓу Истанбул и Охрид четири пати неделно.

На вториот повик на Владата во јануари годинава беше избрана само авиокомпанијата „Изиџет“, која доби субвенции за воведување авиолинии од Скопскиот аеродром до Женева и до аеродромот „Орли“ во Париз. Од Скопје за Париз почна да се лета од 2 април, а за Женева ќе се лета од 3 ноември.

За да ја намали зависноста од „Визер“ кој држи над 60 посто од авиосообраќајот во земјава, Владата во август лани донесе одлука за субвенционирање на авиосообраќајот по дестинации, а не како досега по авиокомпании. Наместо 7 евра по патник на заминување, сега субвенцијата е 9 евра по патник на доаѓање на Скопскиот аеродром. Ако претходно беше по 4 евра од Охридскиот аеродром, сега за стимулирање на туризмот, е 12 евра по заминат патник од овој аеродром.

„Визер“ од Скопскиот аеродром лани укина шест авиолинии, а годинава треба да воведе нови три. Со почетокот на зимската сезона на летање укинати беа летовите до Келн, Копенхаген и Стокхолм-Скавста, после Божиќ немаше лет ни до Бремен, а од април е прекината и линијата за Салцбург. Луксембург беше укинат кон средината на јануари 2024 после само два месеци летање.

Во 2023 година на огласот на  Владата за субвенционирање на авиолинии, „Визер“ доби субвенции за летови до Љубљана, Салцбург, Луксембург и Штутгарт, но од овие линии функционира само авиолинијата Скопје-Љубљана и во моментов само за неа компанијата добива субвенции.

• ЗА ДА СЕ НАМАЛИ ЗАВИСНОСТА ОД ВИЗЕР, ВЛАДАТА НАМЕСТО КОМПАНИИ ЌЕ СУБВЕНЦИОНИРА АВИОЛИНИИ, ЌЕ СЕ ПЛАЌА ПО ПАТНИК ВО ДОАЃАЊЕ, А НЕ ВО ЗАМИНУВАЊЕ

• „ВИЗЕР“ УКИНА ШЕСТ ЛЕТОВИ, ЌЕ ВОВЕДЕ ТРИ, СУБВЕНЦИИ ОД ВЛАДАТА ДОБИВА САМО ЗА ЉУБЉАНА

А. АНТЕВСКА