Кривичниот суд во Скопје го добил известувањето на Собранието дека им е одземен имунитетот на шесте пратеници, кои се осомничени за учество во организираниот напад во парламентот на 27 април.
За овие пратеници, Јавното обвинителство за гонење организиран криминал и корупција побара притвор.
„Известувањето од Собранието, поврзано со барањето на судот за имунитетот на пратениците, за кои е поднесен предлог од ОЈО за гонење организиран криминал и корупција, е пристигнато во Основниот суд Скопје 1 и тој е доставен на надлежните судии на претходна постапка, со што се создадени услови да се постапува по предлогот на Обвинителството“, соопшти Кривичниот суд.
Судот не прецизираше кога пратениците Крсто Мукоски, Јохан Тарчуловски, Љубен Арнаудов, Жаклина Пешевска, Сашо Василевски и Љупчо Димовски ќе бидат повикани на распит и кога ќе се одлучува по барањето за притвор.
Тие се товарат за кривичното дело терористичко загрозување на уставниот поредок и безбедноста на државата, за што е предвидена минимална казна е десет години затвор.
