ВАЛЕНТИНА БОЖИНОВСКА И СРЃАН КЕРИМ ЌЕ ГО СОВЕТУВААТ МИНИСТЕРОТ БУЈАР ОСМАНИ

    ВАЛЕНТИНА БОЖИНОВСКА И СРЃАН КЕРИМ ЌЕ ГО СОВЕТУВААТ МИНИСТЕРОТ БУЈАР ОСМАНИСпоред Османи, Валентина Божиновска и Срѓан Керим ќе го советуваат како „лица кои се ослободени од притисокот на дневната политика“. (Фото: СДК.МК)

    Валентина Божиновска и Срѓан Керим се меѓу 26-те членови на Стратешкиот совет за надворешна политика, како советодавно тело на Министерството за надворешни работи (МНР). Денеска министерот Бујар Османи имаше состанок со членовите на кој кажа дека има имиња со различни мислења и токму тоа е важно за овој Совет да чуе различни идеи и ставови.

    Членови на советот се и Марјан Ѓуровски, Нано Ружин, Денко Малески, Марко Трошановски, Ивана Туфегџиќ, Гордан Горгиев, Лазар Еленовски, Живко Мукаетов, Виктор Габер, Ајдован Адемовски.

    „Ова ќе биде советодавно тело на Министерството за надворешни работи. Се работи за квалитетни луѓе, добри познавачи на надворешната политика. При изборот внимавав да добиеме широка експертиза, да бидат лица кои се ослободени од притисокот на дневната политика. Спремен сум да ги вкрстиме различните ставови за да изградиме заеднички став“, рече министерот Османи на прес-конференцијата по одржување на конститутивната средба.

    Како што кажа Османи, членовите ќе работат волонтерски односно нема да добиваат никаков паричен надоместок за нивниот ангажман.

    Валентина Божиновска после парламентарните избори на 11 декември 2016, како тогашна директорка на Комисијата за односи со верските заедници и религиозни групи, на протестите пред Државната изборна комисија (ДИК) кои тогаш ги организираше ВМРО-ДПМНЕ, во говор рече дека собирот пред ДИК е „вечер на ножевите“.

    „Да ги поздравам бранителите, оваа вечер е вечер на ножевите, оваа вечер е вечер или на разумот или на лудилото на еден човек. На последниот македонски предавник Зоран Заев. Ќе се случи еден ден во кој ќе кажеме ’елате браќа и сестри да се собереме и да тргнеме, да видиме кој ќе ни биде цар, а кој шпион“, рече тогаш Божиновска.

    Два месеца подоцна, почнаа протестите кои кулминираа со организираниот напад на Собранието на 27 април 2017, во кој беа повредени пратенци и новинари, меѓу нив и сегашниот премиер Зоран Заев. Во септември 2018, градоначалникот Петре Шилегов не го прифати предлогот на советниците од ВМРО-ДПМНЕ во Град Скопје Божиновска да биде член на одборот за доделување на наградата „13 Ноември“.

    Срѓан Керим, поранешниот дипломат и ексминистер за надворешни работи во Владата на Љубчо Герогиевски, е еден од двајцата осомничени во случајот на СЈО за кривични дела за пропаднатата медиумска компанија Медиа принт Македонија (МПМ). Осомничен е за кривичните дела: лажен стечај, повластување на доверители и злоупотреба на службената положба и овластувањата, за кои се предвидени затворски казни. Откако од сопствеништвото на МПМ се повлече Орка холдинг на бизнисменот Орце Камчев, Срѓан Керим беше единствениот сопственик на фирмата која ги издаваше дневните весници „Вест“, „Утрински“ и „Дневник“ и магазинот „Теа Модерна“ . Откако Керим и директорката Јана Станисављева го однесоа МПМ во стечај, доверителите останаа со ненаплатени долгови од оваа компанија во износ од над 3 милиони евра. Додека тој беше управител престанаа со печатење весниците, при што беа отпуштени над 300 новинари, печатарски работници и придружни службеници, и овие весници веќе не постојат.

    Керим не беше на денешниот Совет оти живее во Хрватска.

    А. АНТЕВСКА

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира