Премиерот Зоран Заев кажа дека Владата на денешната седница донела одлука еднострано да го раскине договорот за концесија за експлоатација на минерални суровини со фирмата „Сардич МЦ“ за локалитетот Казандол.

„Донесовме одлука за едностран раскин на договорот за концесија за експлоатација на минерални суровини на локалитетот Казандол во општините Валандово, Богданци и Дојран“, изјави Заев на прес-конференција.

Како што кажа Заев, концесионерот не го исполнил условот од договорот во рок од две години од добивање на концесијата да изгради постројка за експлоатација на катоден бакар со капацитет да процесира најмалку 50% од експлоатираната руда.