Владата му се извини на австрискиот канцелар Себастијан Курц за погрешното знаме за време на официјалната церемонија на дочекот пред владината зграда утринава. Место со австриско знаме, Курц беше пречекан со латвиско знаме, за што од Владата велат дека станува збор за ненамерен протоколарен пропуст до кој што дошло „поради големата сличност во димензиите и колоритот на знамињата на Австрија и Латвија.
„Владата на Република Македонија упатува извинување до Република Австрија за ненамерниот протоколарен пропуст при посетата на Сојузниот Канцелар Себастијан Курц во Република Македонија. Пропустот е направен од страна на службите за протокол на Владата на Република Македонија и на Министерството за надворешни работи“, соопштија од Владата.
Грешката први ја забележаа австриските новинари кои ја следат посетата на Курц, а потоа веста за грешката се пренесе и до владиниот протокол. Внатре во Владата, каде што се одржа заедничката прес-конференција на премиерот Зоран Заев и Курц, беше поставено точното знаме – австриското.
