Лице кое се лекува со метадонска терапија за хепатит Ц, било дискриминирано од јавната установа Здравствен дом Куманово, која одбила да го прегледа и да му даде лекарско уверени за полагање возачки испит категорија Б.

Дискриминацијата врз здравствена основа и припадност на маргинализирана група ја утврди Комисијата за заштита од дискриминација, а по претставка од Коалицијата за сексуални и здравствени права на маргинализираните заедници.

„Здравствен дом Куманово без почитување на претходно утврдената процедура, усно одбила да го услужи лицето, претпоставувајќи дека инјектира дрога, како генерален заклучок врз основа на препишаната терапија за хепатит Ц, без притоа да се информира за неговата состојба“, велат од Колацијата за сексуални и здравствени права на маргинализираните заедници.

Лицето е на метадонски третман од мај 2000 година. Според Коалицијата тоа редовно и дисциплинирано ја зема терапијата, а работи и вложува во своето образование и реинтеграција во општеството.

„Според мислењето на д-р Дарко Костовски, психијатар од Градската општа болница ‘8-ми септември’ во Скопје, како и според правилниците и препораките, оние лица кои се стабилни на редовен метадонски третман, можат непречено да управуваат со моторно возило и земјоделски машини. Опасноста постои ако терапијата не се зема редовно, а таквата опасност е исклучена во горенаведениот случај“, велат од Колацијата за сексуални и здравствени права на маргинализираните заедници.

Според мислењето на Комисијата за заштита од дискриминација во случајов станува збор за директна дискриминација, бидејќи лицата кои не се носители на вирусот на хепатит Ц, може да добијат комплетен лекарски преглед и констатирање во лекарското уверение за способност или неспособност за управување со моторно возило.

„Редовно имаме случаи каде лицата кои употребуваат дрога се предмет на стигматизација и дискриминација во здравството. Од здравствените работници се очекуваа да знаат дека луѓето на метадонска терапија слободно можат да управуваат со моторни возила, ако редовно примаат правилно администрирана терапија. Здравствениот систем треба да помага при лекувањето и ресоцијализацијата на луѓето, кои се лекуваат од опијатна зависност, а не да биде првата пречка со која се соочуваат во процесот на реинтеграција“, вели Драгана Дрндаревска, правна советничка во Коалицијата СЗПМЗ.

Коалицијата бара од Министерството за здравство и Државниот здравствен и санитарен испекторат да ги информира здравствените работници за мислењето на КЗД и да преземат мерки за да нема дискриминација на луѓето кои употребуваат дроги.