Обвинителството за организиран криминал и корупција попладнево кажа дека во тек е акција со МВР во која се врши претрес на повеќе места во Македонија, се собираат докази, се запленуваат предмети и се апсат лица за финансиски криминал од поголеми размери, но најавеното соопштение изостана, зашто претресите уште траат.

„По наредба на надлежен обвинител, се врши претрес на повеќе локации низ државата и се обезбедуваат лица осомничени за злосторничко здружување, перење пари, даночна измама и даночно затајување од поголеми размери“, е единствената информација во врска со најновата акција.

Деталите за акцијата, за сторениот криминал и за приведените лица, ќе бидат соопштени утре, петок.

Неофицијално, познати имиња од бизнисот, политиката, локалната самоуправа, немало овојпат меѓу уапсените за големиот финансиски криминал со кој е оштетена државата. Како и досега, најверојатно се апсат и вработени во УЈП, без кои по се изгледа фирмите и поединците, не можат да ги вршат овие кривични дела.

С. К. ДЕЛЕВСКА