Премиерот Зоран Заев кажа дека е донесена одлуката да се изгради железничката пруга кон Бугарија, како дел од Коридорот 8, во неговото обраќање на состанокот на шефови на држави и влади на Самитот за Западен Балкан во Трст, Италија.
„Железничното поврзување на Република Македонија со Република Бугарија е пример колку ние сериозно гледаме на оваа Агенда за поврзување во регионот. Одлуката веќе ја донесе нашиот меѓународен партнер ЕБОР, за изградбата на железничката пруга Куманово-Деве Баир, како дел од Коридорот 8, на барање на Македонија“, рече Заев.
Вкупната инвестиција за железничката пруга е проценета на 152,3 милиони евра, а Европската унија ќе учествува во изградбата со грант од 70 милиони евра, што е речиси половина од трошоците.
На Самитот во Трст, Заев имаше и билатерална средба со германската канцеларката Ангела Меркел која изразила поддршка за новата Влада, за суштински реформи и за определбата за интеграција на Република Македонија во ЕУ, соопштија од кабинетот на премиерот.
„Владата е одлучна да ги спроведе потребните реформи и да ја осигура евроатлантската иднина на Македонија, а со тоа и квалитетен живот за граѓаните“, рекол Заев за време на неговата средба со Меркел.
Канцеларката Меркел најавила поддршка од Република Германија во реформскиот и евроатлантскиот интеграциски процес. Двајцата лидери изразиле заедничка определба за продолжување и зголемување на интензитетот на соработката помеѓу двете држави.
