Екипата на македонскиот документарец филм „Медена земја“ кој денес доби историски две номинации за Оскар, за најдобар документарец и за најдобар странски филм, вели дека „Атиџе и пчелите се прототип за новиот генетски материјал, кој треба да победи во битката на титаните, каде природата се бори со деструктивното“.

Режисерите Тамара Котевска и Љубомир Стефанов, заедно со еден од двајцата кинематографери, Самир Љума се во Еквадор, од каде го следеа преносот за номинациите за Оскарите.

• „МЕДЕНА ЗЕМЈА“ СО ДВЕ НОМИНАЦИИ ЗА ОСКАР, ЗА НАЈДОБАР ДОКУМЕНТАРЕЦ И ЗА СТРАНСКИ ФИЛМ, ИСПИША ИСТОРИЈА
• „ЏОКЕР“ ДОБИ 11 НОМИНАЦИИ ЗА ОСКАР, „1917“ И „БЕШЕ ЕДНАШ ВО ХОЛИВУД“ ПО 10

„Преку жената која случајно ја сретнавме, пред светот се отвори приказна – алегорија на една глобална слика каде хуманото и натуралното се борат да преживеат. Среќни сме дека светските критичари и членовите на Академијата го препознаа крикот на планетата, кој ечи меѓу фрејмовите во филмот. Ја открија големината на човекот, преку големината на единката. Се разнишаа убедувањата дека радоста се крие во поседувањето. Филмот повикува на скромност, а кога ја гледаме љубовта во очите на гледачите, силно веруваме дека пораката е препознаена и дека скромноста е новото време низ кое со радост ќе зачекориме“, стои во објавата на екипата на „Медена земја“ на стфатана на филмот на Фејсбук.

Ова е прв пат во историјата на Оскарите документарен филм да е номиниран во две категории

Тие додаваат дека ова е прв пат во историјата на Оскарите документарен филм да е номиниран во две категории, што значи, како што велат, дека ова не е само успех со историски размери, туку истово „потврдува дека документариот јазик влегува во ерата на негово вистинско вреднување, каде стои рамо до рамо со фикционалната нарација, а заради својата реалност заслужува посебна опсервација. Провоцира искрено сочувство, кое не се заборава после гледањето на филмот“.

„Големо е достигнувањето на филмот. Големи се фестивалите, кои го слават и величаат. Но уште поголема треба да биде промената на која се надеваме. Таа промена тргнува од секој од нас поединечно“, вели екипата на филмот, во која се и кинематограферот Фејми Даут и продуцентот Атанас Георгиев.

Меѓу петте номинирани за најдобар документарец покрај „Медена земја“ се и „Американска фабрика“, „Пештерата“, „Работ на демократијата“ и „За Сама“, а за најдобар странски филм номинирани се и „Корпус кристи“ од Полска, „Клетници“ од Франција, „Болка и слава“ од Шпанија и „Паразит“ од Јужна Кореја.

Деведесет и второто доделување на престижните Оскари е закажано на 10 февруари во театарот Долби во Холивуд. Преносот  почнува околу 2 часот пополноќ, според средноевропско време.

Номинациите за „Медена земја“ се точно 25 години по онаа за „Пред дождот“ на Милчо Манчевски, кој досега беше е единствениот македонски филм кој добил номинација за Оскар, во 1995 година. Претходно, во 1980 како југословенски кандидат номинација за Оскар имаше добиено краткиот документарец „Дае“ на Столе Попов.

Б. НЕСТОРОСКА