„Сестра, брат и шахта“, новиот филм на Милчо Манчевски, победи на Филмскиот фестивал во Токио, кој е од А-категорија. Филмот ја освои главната награда на фестивалот „Токио Гран при“ (Tokyo Grand Prix).
Ова е првпат македонски филм да победи на фестивал од А-категорија после „Пред дождот“ на Манчевски во Венеција во 1994.
„За беспрекорното спојување на хуморот, трагедијата и драмата, за човечноста и сочувството што ги покажува кон своите ликови, за сложениот, но кохерентен филм, кој истовремено успева да биде трогателен и разигран, големата награда на Токио – Наградата на гувернерот на Токио за најдобар филм – му се доделува на ‘Сестра, брат и шахта‘“, изјави претседателот на жирито, легендарниот австралиски режисер Ролф де Хер.
Манчевски им се заблагодари на сите кои верувале во создавањето на филмот.
„Многу ми е мило што светот ја сака нашата шахта. Благодарност до феноменалната екипа, глумците, финансиерите, спонзорите за довербата во еден чуден филм. Ете пример дека истрајноста и правдата победуваат. Напред, шахта!“, изјави Манчевски по доделувањето на Гран при наградата.
На свеченото затворање на фестивалот наградата ја подигнаа главните актери Сара Климоска и Филип Трајковиќ и продуцентот Јане Ќортошев.
„Во Токио дојдовме со шахта, а во Македонија се враќаме со оваа прекрасна награда. Мислам дека ова е навистина добра зделка. Од неизвесноста дали воопшто ќе успееме да го снимиме филмот, до оваа вечер во Токио, навистина поминавме долг пат. Голема благодарност до сите кои веруваа во нас и нè поддржуваа на тој пат. Благодарност до Меѓународниот филмски фестивал во Токио, кој веруваше во нашиот филм и до жирито кое му ја додели оваа прекрасна награда. Аригато гозаимас!“, изјави Ќортошев.
Годинава, на Токискиот меѓународен филмски фестивал пристигнаа 1.892 филмови од 112 земји и региони. Во натпреварувачката програма беа избрани 15 филма.
„Сестра, брат и шахта“ е чудна комедија за оние кои имаат и оние кои немаат, во исто време лута сатира и суптилна поема за брат и сестра кои живеат на маргините на општеството. Иако се случува во денешна Македонија, филмот содржи универзално размислување за тоа како луѓето живеат и се поврзуваат во современиот свет.
Ова е деветти долгометражен игран филм на Манчевски, кој оваа година го реализираше и долгометражниот документарен филм „Добри луѓе“ за трагедијата во Кочани, со што во иста година претстави два филма пред меѓународната публика.
Освен Агенцијата за филм, филмот го помогнаа и националните филмски фондови и приватни инвеститори од Бугарија, Србија, Албанија, Италија и Англија.
Играат Сара Климоска, Филип Трајковиќ, Соња Михајлова, Петар Мирчевски, Јордан Симонов, Дејан Лилиќ, Јасмина Василева, Стефан Николовски, Ана Костовска, Иван Ѓошевски, Виктор Арсов, Марина Поп Панкова, Александар Степанулески и Марин Гавриловски.
Дејвид Манс од Велика Британија е дизајнер на продукција, директор на фотографија е Стефано Фаливене од Италија, кастинг директорка е Милка Анчевска, костимите се на Жаклина Крстевска, а шминката на Бистра Кечиџиева од Бугарија. Продуцент на филмот е Јане Ќортошев.
Филмот се снимаше со меѓународна екипа на локации низ и околу Скопје. Копродуценти се „Гала филм“ од Бугарија, „Сенс продакшн“ од Србија, „Амаркорд продакшн“ и „Аугустус колор“ од Италија, „Беркли медиа груп“ од Англија и Тирана филм институт од Албанија.
