Карлос Алкараз го победи Новак Ѓоковиќ со 6-2, 6-2, 7-6 (4) во машкото финале на Вимблдон и ја освои својата четврта Грен слем титула на 21-годишна возраст. Тоа беше реприза од минатогодишниот првенствен натпревар на тревата на Ол Ингланд Клуб, кој Алкараз го освои во пет сета. Денешниот меч – одигран пред публиката на Централниот терен, во која беше и Кејт, принцезата од Велс, во редок јавен настап откако објави дека има рак – беше многу полесен за Алкараз, барем додека не погреши кога имаше три поени за меч додека сервираше за победа кога беше 5-4 во третиот сет.

Сепак, Алкараз се поврати и по вкупно 2 часа и 27 минути игра го освои вториот голем трофеј по ред по минатомесечниот триумф на земјена подлога на Отвореното првенство на Франција Ролан Гарос.

Шпанецот ја освои својата прва грен слем титула на Отвореното првенство на САД во 2022 како тинејџер, и никој никогаш не собрал повеќе Слем титули пред да наполни 22 години од него.

37-годишниот Ѓоковиќ, кој носеше сив стегач на оперираното десно колено, не успеа да ја освои осмата титула на Вимблдон и рекордната 25-та голема титула. Тој го скина менискусот на Ролан Гарос на 3 јуни, а два дена подоцна беше опериран во Париз.

Во денешното финале, Алкараз имаше предност од 5-4, 40-ништо во третиот сет, но со серија од пет грешки практично му подари гем и сет на Ѓоковиќ. Тоа беше единствениот пат на целиот меч Ѓоковиќ да го скрши Алкараз. Но, во тај-брејкот што следеше, Алкараз го искористи четвртиот меч поен и го освои трофејот.