Освојувачот на две сребрени медали од Зимската специјална олимпијада во Австрија Бојан Трајковски денеска се врати во Скопје. Трајковски, кој во Австрија освои сребро во супервелеслалом и велеслалом, на аеродромот беше пречекан од другарите атлети од Специјалната олимпијада.

„Ветив дека ќе станам шампион и станав шампион. Очекував еден медал, а освоив два”, кажа Трајковски на пречекот на скопскиот аеродром.

Неговиот тренер Јован Јовановски рече дека е презадоволен оти Бојан направил многу повеќе отколку што очекувале.

На Зимската специјална олимпијада во Австрија учествуваа 2.700 спортисти и 1.100 тренери од 107 нации, а се поддржани од 3.000 волонтери. Ова беа најмасовните зимски олимписки игри во историјата на Специјална олимпијада.

Натпреварите се одржаа во три скијачки центри: Грац, Шладминг и Рамзау ам Дахштајн, а спортистите се натпреваруваа во девет дисциплини: уметничко лизгање, брзо лизгање, хокеј во сала, флорбол, одење по снег, алпско скијање, скијачко трчање, сноубординг и стикшутинг.