На „Крали Марко ултратреил“ (КМУТ), најголемата трка на планинарски ултрамаратон во Македонија што се трча на патеки од 16, 31, 65 и 110 км, и се одвива викендов во Прилепско и Трескавец со учество на стотици тркачи од цел свет, локалните жители ги менувале маркациите на патеките, поради што им ја отежнале трката на ултрамаратонците, а неколкумина и не ја завршиле оти се загубиле на планинскиот терен.

„Локалците секоја година прават проблеми со тоа што ги тргаат маркациите на патеките. Но годинава се надминале во креативност, и ги менувале маркациите. На пример, ако маркацијата покажувала насока надолу, тие ја ставиле да покажува нагоре. Многумина тркачи имале проблем да се снајдат дури и со Џи-Пи-Ес, се загубиле, а и опасно е, оти најдолгата трка почнува во 23ч и се трча ноќе во планински терен“, велат организаторите.

Трката ја организираат здружението ТРЕКС и планинарското друштво „Макпетрол“ во соработка со Општина Прилеп. Годинава е седмо издание, а една од трките носи квалификациски поени за славната ултрамаратонска трка на Мон Блан.

Годинава, меѓу тркачите беше и министерот за финансии Драган Тевдовски, кој денеска трчаше на патеката од 31 километар.