Претседателот на ФИФА, Џани Инфантино, кажа дека треба да се укине забраната за учество на Русија во меѓународните фудбалски натпреварувања.

Русија беше исфрлена од натпреварувањата на ФИФА веднаш по почетокот на инвазијата на Украина во февруари 2022 и забраната остана во сила, иако на некои младински селекции им беше дозволено да играат од 2023.

„Мораме да ја укинеме суспензијата. Јас сум против забрани и бојкоти. Тие создаваат уште повеќе омраза. Би испратило позитивна порака ако девојчиња и момчиња од Русија учествуваат на фудбалски турнири низ Европа“, кажа Инфантино.

Неговите коментари очекувано предизвикаа гневна реакција на Украина.

„679 украински момчиња и девојчиња никогаш нема да можат да играат фудбал зашто се убиени од Русија. И продолжува да убива, додека моралните дегенерици сугерираат укинување на забраните, и покрај неуспехот на Русија да ја заврши својата војна“, изјави украинскиот министер за надворешни работи Андриј Сибиха.

Украинскиот министер за спорт Матви Бидни изјави дека „зборовите на Инфантино звучат неодговорно и инфантилно“.

„Тие го одвојуваат фудбалот од реалноста во која се убиваат деца“, рече Бидни.

Инфантино има блиски односи со Доналд Трамп и неодамна му ја додели нововостановената Награда за мир на ФИФА. Светската фудбалска организација исто така отвори канцеларија во кулата „Трамп“ во Њујорк во јули, а ќерката на Трамп, Иванка, стана членка на одборот на образовен хуманитарен проект поврзан со продажбата на влезници за СП 2026.