Жена на 90-тина години е пронајдена жива под урнатините пет дена по разорниот земјотрес што ја погоди централна Јапонија. Спасувачките екипи ја откриле во урнатините на двокатната зграда во градот Сузу.

Земјотресот со јачина од 7,5 степени според Рихтеровата скала го погоди брегот на Јапонското Море, срамнувајќи ги градовите на оддалечениот полуостров Ното. Спасувачките тимови работеа низ снег за да достават резерви до изолираните населби, шест дена по силниот земјотрес, при што загинаа најмалку 128 луѓе. Обилните снежни врнежи што се очекуваат во префектурата Ишикава подоцна денеска и во текот на ноќта ја зголемија итноста. По земјотресот на 1 јануари, 195 лица сè уште се водат како исчезнати, што е мало намалување од над 200 пријавени претходно, а 560 луѓе се повредени. Следеа стотици последователни потреси, кои го потресоа полуостровот Ното, каде што е центарот на земјотресите.

Според весникот „Јомиури шимбун“, 100 спасувачи биле испратени во градот Сузу откако дознале дека две жени се живи закопани. Повикувајќи се на локални полициски извори, весникот објави дека постарата жена реагирала, но се верува дека добила хипотермија. На истото место, спасувачите пронајдоа и жена на 40-годишна возраст во состојба на кардиопулмонален застој, се вели во извештаите.

Првите 72 часа од операцијата за спасување се сметаат за критични бидејќи после тоа, шансите да се пронајдат живи луѓе значително се намалуваат. Двете жени биле пронајдени неколку дена по затворањето на тој период.