Функционери од американското министерство за финансии вршат притисок за креирање нова банкнота од 250 долари со ликот на Доналд Трамп, во рамките на одбележувањето на 250 години независност на САД.

Весникот „Вашингтон пост“ ја доби скицата на предложената банкнота, во чиј центар се наоѓа портрет на претседателот Доналд Трамп, заедно со зборовите „250 Америка“. Сличен дизајн сподели и конгресменот на Републиканската партија од Кентаки, Енди Бар, во јануари, кој објави фотографија како држи огромна макета на банкнотата од 250 долари.

Според федералниот закон, само починати личности можат да се појават на банкноти, а последниот пат кога жива личност го сторила тоа било во 1866 година, по што тоа било забрането.

Портпарол на Министерството за финансии изјави за весникот дека агенцијата за печатење „спроведува соодветно планирање и длабинска анализа“ во врска со банкнотата од 250 долари. Поранешниот директор на агенцијата Лери Феликс рече дека банкнотата од 250 долари не може законски да се одобри без акт на Конгресот и дека министерот за финансии Скот Бесент мора да добие овластување да го стори тоа.