Американските преговарачи денеска ќе патуваат за Исламабад, но Иран тврди дека негови функционери нема да се сретнат со Американците за да разговараат за крај на војната. Белата куќа кажа дека Стив Виткоф и Џаред Кушнер ќе разговараат со иранскиот министер за надворешни работи Абас Арагчи, кој пристигна во Пакистан вчера.

Сепак, портпаролот на иранското министерство за надворешни работи Есмаил Багеи изјави дека не е планирана директна средба со САД, туку иранските предлози ќе му бидат предадени на посредникот Пакистан.

Доналд Трамп вчера кажа дека Иран ќе достави понуда што ќе ги задоволи американските барања, без да прецизира што ќе содржи. Тој одби да открие со кого преговараат САД, велејќи дека „имаат работа со луѓе кои сега се надлежни таму“.

Портпаролката на Белата куќа, Керолајн Ливит, изјави дека САД забележале одреден напредок од иранската страна во последните денови и се надеваат дека ќе има уште повеќе овој викенд, додека и потпретседателот Џеј-Ди Венс е подготвен да отпатува во Пакистан.

Арагчи најави дека во следните денови ќе ги посети Пакистан, Оман и Русија. Тој синоќа се сретна со пакистанскиот министер за надворешни работи Ишак Дар во хотелот „Серена“, каде што се одржа првата рунда разговори. Пакистански извори претходно изјавија дека американски тим за логистика и безбедност веќе е распореден во Исламабад за потенцијални разговори.

Нова рунда мировни преговори се очекуваше во вторникот, но Иран не потврди дека ќе учествува. Трамп потоа еднострано го продолжи двонеделното примирје, овозможувајќи повеќе време за разговори.