Поранешната германска канцеларка Ангела Меркел апелираше до граѓаните да застанат во одбрана на слободата и демократијата, откако историскиот успех на десничарската партија АФД на покраинските избори предизвика реакции ширум светот.
Таа рече дека нема бесплатен ручек и оти ништо не доаѓа бесплатно, наведувајќи дека секој граѓанин има своја задача што треба да ја исполни. Меркел, која управуваше со Германија повеќе од 15 години, говореше пред 1.200 луѓе во покраината Мекленбург-Западна Померанија, каде што читаше извадоци од својата автобиографија.
Мекленбург-Западна Померанија е следната покраина каде што ќе се одржат избори на 20 септември, заедно со градот-покраина Берлин. По неодамнешниот резултат во Саксонија-Анхалт во неделата, се очекува Алтернатива за Германија (АфД) да оствари голем успех и во Мекленбург-Западна Померанија. На изборите во Саксонија-Анхалт, АфД освои рекордни 43,8 отсто од гласовите и за малку не доби апсолутно мнозинство, завршувајќи далеку пред демохристијаните (ЦДУ), партијата со која раководи канцеларот Фридрих Мерц, а која Меркел ја водеше долги години.
Меркел, која се повлече од политиката на крајот на 2021 година, прочита дел во кој посочува дека денес во невидена мера вистините се нарекуваат лаги, а лагите вистини, и дека во демократиите тоа го користат дури и луѓе на водечки позиции. Таа кажа дека вистинската слобода не се однесува само на личната корист, туку се остварува преку воздржаност и обѕирност.
Според неа, за слободата се потребни демократски услови, бидејќи без демократија нема слобода. Таа рече дека оние што сакаат да живеат во слобода мора да ја бранат својата демократија од структурите што ја загрозуваат, додавајќи дека успехот зависи од заедничкиот ангажман на секој поединец.
Публиката повеќепати аплаудираше за време на настанот кој траеше час и половина, меѓу другото и кога Меркел се осврна на бегалската криза во 2015 година и одлуката во Германија да бидат примени Сиријците кои пристигнуваа преку Унгарија. Таа призна дека таквиот потег, како и нејзината политика за време на кризата со еврото, ја засилиле АфД, која првично започна како партија против еврото пред фокусот да го префрли кон миграцијата.
Сепак, Меркел рече дека граѓаните не смеат да ги напуштат основните начела обидувајќи се да го спречат доаѓањето на таа партија на власт, споменувајќи ги европското единство, слободата на движење и заштитата на човечкото достоинство.
Таа оцени дека демократските партии имаат силно влијание врз растот на АфД, но дополни дека тие нема да постигнат резултат доколку погрешно веруваат оти можат да ја контролираат крајната десница со постојани дебати на теми што таа ги наметнува или преку обиди за реторичко надмудрување без да понудат решенија. Според поранешната канцеларка, потребни се решенија од партиите од политичкиот центар кои ја почитуваат демократијата и немаат намера да го уриваат уставот, без прибегнување кон тактички маневри.
