Антивоениот претседателски кандидат Борис Надеждин изјави дека ќе се жали во врховниот суд откако централната изборна комисија му забрани да учествува на изборите во март, на кои се очекува убедлива победа на Владимир Путин.
Од комисијата претходно кажаа дека пронашле неправилности во потписите што Надеждин ги собра за да може да поднесе кандидатура, додавајќи дека меѓу нив имало и потписи од починати луѓе. Комисијата утврдила дека повеќе од 9.000 потписи поднесени од Надеждин се невалидни. Надеждин изјави дека не се согласува со одлуката на комисијата и најави жалба во рускиот врховен суд.
„Собрав повеќе од 200.000 потписи низ цела Русија и тоа го спроведовме чесно и отворено. Редиците пред нашите седишта и пунктовите за потпишување ги виде целиот свет. Учеството на овие претседателски избори е најважната политичка одлука во мојот живот и нема да се откажам од моите намери“, изјави Надеждин.
Никој не очекуваше победа на 60-годишниот Надеждин, но тој ги изненади аналитичарите со своите критикувања на Путин и на „специјалната воена операција“, за која кажа дека брзо би ја завршил низ преговори. Кремљ објави дека не го смета Надеждин за сериозен ривал на Путин.
