Најстариот претседател во историјата на САД, Џо Бајден, вчера наполни 81 година, додека анкетите покажуваат дека Американците се загрижени дека тој е престар за втор мандат. Бајден постојано се шегува со својата возраст и се обидува да ги увери гласачите дека неговите половина век во јавната служба се предност во справувањето со проблемите на Американците, додека Белата куќа ја брани неговата издржливост.
Ако повторно биде избран, тој ќе има 86 години на крајот на вториот мандат. Роналд Реган, кој претходно беше најстариот претседател на САД, имаше 77 години кога ја напушти Белата куќа во 1989. За споредба, најсериозниот ривал на Бајден, Доналд Трамп, има 77 години.
Анкета од септември покажа дека гласачите се загрижени за возраста и физичката подготвеност на Бајден. Седумдесет и седум проценти од испитаниците, од кои 65% биле демократи, рекле дека Бајден е престар за да биде претседател, а само 39% сметаат дека е доволно ментално остар. Наспроти ова, 56% луѓе рекле дека Трамп е престар за претседател.
„Возраста на претседателот не треба да биде главниот фокус, туку неговото искуство. Мора да го судиме според она што го направил, а не според бројките“, изјави портпаролката на Белата куќа, Карин Жан-Пјер.
Токму на денот кога Бајден имаше роденден, Трамп објави извештај од неговиот лекар, кој, како што кажа, покажува дека општото здравје му е извонредно.
