Градоначалникот на Белград Александар Шапиќ сака посмртните останки на поранешниот југословенски претседател Јосип Броз-Тито да се вратат во неговата родна Хрватска. Шапиќ се залага за ексхумирање на југословенскиот доживотен претседател, тврдејќи дека преселувањето на Тито во неговото родно место во хрватскиот град Кумровец е клучно прашање за Србија.
„Мислам дека преместувањето на гробот на Јосип Броз од Музејот на Југославија е исклучително важна работа за српскиот народ и иднината на оваа земја“, рече Шапиќ за време на состанокот на градското собрание, на кој беше повикан да разговара за буџетот.
Но, во интервју за европското издание на „Политико“, српскиот претседател Александар Вучиќ кажа оти не му се допаѓа идејата.
„Тоа нема да се случи“, рече Вучиќ. „Никогаш не сум бил голем љубител на комунистите и на комунистичкиот режим, но Јосип Броз е дел од нашата историја, тој живеел овде и бил погребан тука, и ќе остане дел од српската и југословенската историја“, рече Вучиќ.
Кавгата околу коските на Тито ја нагласува деликатната рамнотежа што српскиот лидер, кој многумина во странство го сметаат за националист, мора да ја одржува во своите редови, кои вклучуваат многу личности далеку од неговата десница.
Градоначалникот на Белград, Александар Шапиќ сака во Белград да се изгради споменик на четничкиот лидер Дража Михајловиќ (Фото: Танјуг)
Тито беше титан на југословенската историја и владееше со земјата со децении наназад кога беше комунистичка држава. Тој беше погребан во Белград во 1980 година со голем државен погреб. Иако многумина во регионот сè уште го сметаат за обединувачка фигура, српските националисти тврдат дека неговото хрватско и словенечко етничко потекло налагаат неговите останки да бидат преместени надвор од Србија. Шапиќ додаде дека наместо да го одржува мавзолејот на Тито, кој е дел од поширокиот комплекс на Музејот на југословенската историја во главниот град, Белград треба да размисли за подигнување споменик на Драгољуб Дража Михаиловиќ, српскиот водач на четничкото движење кој беше осуден на смрт по Втората светска војна.
„Мислам дека тој конечно треба да има споменик во Белград, на достоинствено место во центарот на градот“, рече Шапиќ.
Главната улица во Сараево, главниот град на Босна и Херцеговина, сè уште го носи името на Тито, како и некои улици во Македонија, Црна Гора, Хрватска и Словенија. Дури и места подалеку од Србија како Алжир, Бразил и Египет имаат улици што го носат името на Тито, како и земјите од ЕУ, Франција и Италија.
Југословенскиот претседател Јосип Броз Тито пристигнува во Картум, Судан, во државна посета на 12 февруари во 1959 година. (Фото: Гети)
Како доживотен претседател на Социјалистичка Федеративна Република Југославија, Тито водеше социјалистичка земја која одржуваше блиски односи и со Западот и со Истокот. Фигури како конзервативниот британски премиер Винстон Черчил беа меѓу неговите блиски пријатели, додека комунистичкиот кубански претседател Фидел Кастро го снабдуваше со најдобриот врвен тутун од островската држава.
Стотици илјади го имаат посетено гробот на Тито и придружниот музеј во Белград.
