Доналд Трамп објави дека се многу блиску до постигнување мировен договор за Газа и мир на Блиски Исток откако денеска го прими израелскиот премиер Бенјамин Нетанјаху во Белата куќа. Таа претходно го објави мировниот документ што Трамп го замисли како „сеопфатен план за крај на војната во Газа“, кој се состои од 20 точки. Тој предвидува Газа да стане „дерадикализирана зона без терор која нема да претставува закана за своите соседи“.
„Тесно соработувам со Биби Нетанјаху за да се постигне вечен мир на Блиски Исток. Блиску сме до тоа. Ова е потенцијално еден од најголемите денови во историјата на цивилизацијата. Ова е историски ден за мирот“, кажа Трамп, откривајќи дека на планот работеле повеќе држави, особено од регионот.
Нетанјаху кажа дека денешниот состанок е клучен чекор кон крајот на војната во Газа и мир на Блиски Исток.
„Го поддржувам вашиот план за крај на војната во Газа. Тој ќе обезбеди Хамас никогаш повеќе да не биде закана за Израел. Ако Хамас го отфрли планот или го прифати, а потоа не го спроведе, ние ќе ја завршиме работата“, рече Нетанјаху.
Според планот на Трамп, војната ќе заврши моментално откако тој ќе биде прифатен од двете страни, израелската војска ќе се повлече на договорената линија, по што во рок од 72 часа ќе бидат пуштени сите преостанати живи и мртви заложници. Израел потоа ќе ослободи 250 палестински затвореници осудени на доживотен затвор и уште 1.700 лица уапсени по 7 октомври 2023. Планот исто така предвидува Газа да биде обновена во интерес на нејзините жители.
„Како дел од планот, арапските и муслиманските земји ќе придонесат да се постигне брза демилитаризација на Газа. Сите тунели и производствени капацитети на Хамас ќе бидат уништени. Заканата од Хамас ќе биде уништена. Јас не сум се договарал со Хамас, тоа ќе го прават арапските и муслиманските земји. Мислам дека тие имаат разбирање. Ако не успеат да се спогодат со Хамас, Израел ќе има целосна поддршка од САД да ја доврши работата и да ја уништи заканата од Хамас“, кажа Трамп, додавајќи дека Хамас е единствената страна која засега не го прифатила договорот.
Додаде дека посебен „мировен одбор“ ќе го надгледува спроведувањето на планот, на чие чело ќе биде самиот тој. Во него ќе бидат и лидери на други земји.
„Има многу Палестинци кои сакаат да живеат во мир, но тие мора да преземат одговорност за својата судбина. Тие имаа тежок живот под Хамас. Ако не го прифатат мојот план, никој друг нема да им биде виновен. Ова е крајно фер предлог. Градењето мир нема да биде лесно, но многу животи се во прашање за да не се обидеме“, рече Трамп.
