Досега непознато дело од прославениот американски сликар Џексон Полок е пронајдено во Бугарија во рамките на полициска истрага на меѓународни шверцери на уметнички дела. Бугарското радио соопшти дека сликата би можела да биде вредна до 50 милиони евра.

Во оваа меѓународна операција досега се уапсени тројца Грци и еден бугарски државјанин.

„Ова е меѓународна операција во која што учествуваат Европол, Грција и други држави. На наша голема радост, успеавме да ја пронајдеме оваа слика и вештачењето покажа дека станува збор за оригинална, незаведена слика од 1949 година“, изјави Петар Тодоров, главниот секретар на бугарското министерство за внатрешни работи.

Властите не го дадоа описот на сликата, ниту други детали за неа.

Полок, една од водечките фигури на апстрактниот експресионизам во 1940-ите и 1950-ите, почина на 44 години во 1956. Тој се прослави со својата техника на сликање наречена „капење и прскање“.