Осомничен лидер на банда е убиен по драматичниот напад на авион на „Аустријан ерлајнс“ на пистата на аеродромот „Мајка Тереза“ во Тирана.
Авион од типот „ербас“ беше подготвен за полетување, кога се појавиле неколку лица со „калашникови“. Тие влегле во авионот и се верува дека оттаму украле плен во вредност од околу 10 милиони евра. Бандата побегнала, но потоа налетала на полициска патрола, по што дошло до престрелка.
Албанските медиуми објавија снимки од бело комбе со ознаки на даночната агенција како доаѓа на пистата, пред да се случи грабежот вчера околу 15 часот. Се верува дека маскираните криминалци имале информации дека големо количество пари е натоварено во авионот, кој требало да полета за Виена. Медиумите информираат дека грабежот траел три-четири минути, при што бил украден поголемиот дел од парите.
Кратко време по бегството, бандата се соочила со полиција, а во престрелката, еден од тројцата криминалци бил убиен. Комбето подоцна било пронајдено запалено.
„Го елиминиравме лидерот на бандата. Сите учесници во грабежот се идентификувани“, изјави вицепремиерот на Албанија, Ерион Браче.
