Реџеп Таип Ердоган положи заклетва за третиот петгодишен претседателски мандат, со што го продолжува своето владеење и во третата деценија. Најдолговечниот турски лидер освои 52,2% гласови во вториот изборен круг на 28 мај, наспроти повеќето предизборни анкети. Тој освои нов мандат додека земјата се бори со економска криза и со последиците на февруарските катастрофални земјотреси.
По положувањето на заклетвата во парламентот, ќе има и посебна церемонија во претседателската палата, на која ќе присуствуваат високи претставници на 78 држави и меѓународни организации, меѓу кои и шефот на НАТО, Јенс Столтенберг, унгарскиот премиер Виктор Орбан и претседателот на Венецуела, Николас Мадуро.
Ердоган денеска ќе го именува и својот нов кабинет, при што се очекува промена во неговиот неортодоксен пристап кон економската политика. Во кабинетот треба да влезе и поранешниот министер за финансии Мемет Симсек, со што земјата би можела да отстапи од својата долгогодишна политика на ниски каматни стапки, и покрај високата инфлација и строгата државна контрола на пазарите.
Шеесет и деветгодишниот Ердоган беше избран за премиер во 2003, а во 2014 го освои првиот претседателски мандат, за потоа на референдум да ги зајакне своите извршни овластувања.
