Исчезнувањето и смртта на најмалку 10 лица поврзани со чувствителни истражувања во САД предизвикаа интерес кај онлајн детективите, а сега и кај федералните истражители. Но, за ожалостените роднини, сите шпекулации се одвратни.
„Карл би се смеел на теориите на заговор за неговото убиство. Мислам дека се апсолутна бесмислица“, вели Луиз Грилмер, чиј 67-годишен сопруг Карл Грилмер беше застрелан во нивниот дом во Лано, Калифорнија, во февруари.
Осомничениот убиец на Грилмер, 29-годишен локален жител, е обвинет за убиство и провала и треба да се појави во суд следната недела. И покрај апсењето, Грилмер е истакнат во теориите на заговор за смртта и исчезнувањето на околу 10 лица поврзани со строго доверливи лаборатории или научна работа.
Тие често се групираат како „исчезнати научници“, но списокот вклучува административен асистент, генерал на воздухопловните сили, инженер и чувар и опфаќа неколку области, од истражување на егзопланети до фармација. Онлајн детективите сугерираат дека случаите може се поврзани, при што барем еден случај датира од 2022 година. Интересот стана толку голем, што ФБИ најави истрага.
Дури и Доналд Трамп се вклучи во дискусијата, нарекувајќи ги случаите „прилично сериозна работа“, што дополнително ги разгоре шпекулациите.
Но, членовите на семејствата велат дека постојат објаснувања за загубата на нивните најблиски и се обидуваат да ја смират хистеријата. Сопругата на Грилмер, астроном од Калифорнискиот институт за технологија, верува дека нејзиниот сопруг по грешка бил убиен од локален маж кој често правел проблеми.
Сопругата на пензионираниот генерал на воздухопловните сили Вилијам Нил МекКасленд се огласи на Фејсбук една недела по неговото исчезнување на 27 февруари за да „разбие дел од дезинформациите што циркулираат“. Кога се јавила во полиција, таа рекла дека МекКасленд заминал со пиштол и дека во последно време страдал од анксиозност и губење меморија.
„Иако за време на неговата кариера во воздухопловните сили имал пристап до некои високо доверливи програми и информации, тој се пензионираше пред речиси 13 години и се чини неверојатно дека бил киднапиран за да се извлечат некои застарени тајни од него“, кажа Сузан МекКасленд.
Семејството на Мелиса Касијас, исто така, се огласи на Фејсбук, укажувајќи дека таа намерно си заминала.
„Ова беа најтешките шест недели од нашиот живот. Веруваме дека е добро, но не можеме да разбереме зошто не ни се јавила“, напиша нејзиниот сопруг Марк Касијас во август 2025.
Некои други случаи имаа јасни објаснувања.
Физичарот од Универзитетот МИТ, Нуњо Луреиро, беше убиен од поранешен соученик, кој го призна делото на видеоснимки, а друг истражувач исчезнал од својот дом еден месец откако ги изгубил двајцата родители во рок од неколку часа. Неговото тело подоцна било пронајдено во езеро, а неговата сопруга им раскажала на американските медиуми колку нејзиниот сопруг бил тажен по смртта на неговите родители.
Луиз Грилмер вели дека објаснувањата не ги увериле теоретичарите на заговори.
„Многумина од нив ме контактираа, барајќи мое мислење. Реков: ‘Имам нешто подобро од мислење, ги имам фактите‘. Шпекулациите се омаловажувачки за нашите сеќавања“, рече таа.
