Веројатниот иден германски канцелар Фридрих Мерц кажа дека ја прифаќа поддршката на крајната десница, откако денеска во парламентот предложи планови за ограничување на имиграцијата, кои би можеле да поминат само со гласовите на Алтернатива за Германија (АфД), што досега се сметаше за табу во германската политика.

Лидерот на конзервативниот блок ЦДУ/ЦСУ, кој важи за фаворит на вонредните избори на 23 февруари, сака да преземе иницијатива околу мигрантската политика, која повторно се најде во фокусот откако барател на азил од Авганистан уби две лица со нож во Ашафенбург минатата недела. Тој презентираше два необврзувачки предлога во парламентот, барајќи засилени безбедносни мерки и затворање на германските граници за нерегуларната миграција.

Социјалдемократите на Олаф Шолц и Зелените кажаа дека се противат на предлозите, па Мерц мора да се потпре врз АфД и други помали партии за да бидат усвоени. Мерц кажа дека ја прифаќа поддршката од која било партија.

„Од основањето на Сојузната Република Германија пред 75 години секогаш имаше јасен консензус помеѓу демократите. Не соработуваме со крајната десница. Го нарушивте овој основен консензус на нашата република“, кажа Шолц.

Тој го обвини Мерц дека го прекршил зборот откако во ноември збореше дека во долниот дом на парламентот нема да биде поднесен ниеден предлог за кој би била потребна поддршка од АфД. Мерц в петок планира да поднесе нацрт-закон за дополнително сузбивање на миграцијата.

„Можно е АфД в петок за првпат да овозможи мнозинство за изгалсување закон во германскиот Бундестаг“, призна Мерц.