Канцеларката Ангела Меркел објави дека од следниот месец Германците ќе можат слободно да патуваат во 31 европска земја. На списокот не е Македонија.

Германија воведе досега невидено предупредување за патувања на 17 март за да се спречи ширењето на коронавирусот и тоа ќе биде укинато на 15 јуни, што италијанскиот министер за надворешни работи Луиџи ди Мајо го опиша како „решавачки ден за туризмот во Европа“.

„Тоа ќе биде како нов старт за Европа“, изјави Ди Мајо.

Од 15 јуни, Германците ќе можат слободно да патуваат во 26-те членки на Европската Унија, плус Велика Британија и во останатите земји кои се дел од Шенген зоната, како Исланд, Норвешка, Лихтенштајн и Швајцарија.

Германија прво ја отвори границата со Луксембург, а до 15 јуни истото ќе го направи со Австрија и Швајцарија.