Рајхсбиргер долго време беше предмет на национален потсмев, чии припадници се сметаа за обични будали. Дваесет и петмина членови на ова движење денеска се уапсени по рации низ цела Германија, осомничени дека сакале да извршат државен удар и да воспостават ново германско царство на чело со принцот Хајнрих Тринаесетти, потомок на благородничката куќа Ројс.

Безбедносните служби велат дека Рајхсбиргер или Граѓаните на Рајхот станало порадикално и поопасно движење. Оваа група не ја признава поствоената германска држава и ја отфрла власта на нејзината влада. Ова не е организирано национално движење, туку збир на мали групи и поединци расфрлани низ целата Германија кои делат исто верување.

Некои печатат и свои пари и лични карти и сонуваат за креирање сопствена автономна држава. Други одбиваат да плаќаат даноци, а многумина поседуваат оружје.

Властите проценуваат дека припадниците на Рајхсбиргер извршиле над 1.000 екстремистички кривични дела во 2021, двојно повеќе од 2020. Од 21.000 членови, се верува дека само 5% се крајнодесничарски екстремисти, а 10% се потенцијално насилни.

„Тие имаат врски во германската војска, а пандемијата дополнително ја радикализираше групата“, вели Миро Дитрих, експерт за групи кои шират теории на заговор.

Федералните обвинители изјавија дека членовите на Рајхсбиргер веруваат во бројни теории на заговор и демонстрираа заедно со антиваксерите, негаторите на ковид-19 и приврзаниците на движењето Кјуенон на масовните протести во изминатите години.