Маж од Флорида е првото лице кое доби затворска казна за упадот во американскиот Конгрес на 6 јануари. Триесет и осумгодишниот Пол Олард Хоџкинс е осуден на осум месеци затвор откако ја призна вината за насилно влегување во Капитол со цел да ја попречи работата на Конгресот.

Обвинителите бараа 18 месеци затвор, зашто „Хоџкинс придонесол за колективната закана за демократијата“. Се очекува во наредниот период да се изречат стотици слични пресуди за учество во нередите во Капитол.

Зборувајќи во судот во Вашингтон, Хоџкинс призна дека учеството во опсадата била глупава одлука.

„Можам отворено да кажам дека жалам и се каам за моите постапки поради штетата што ѝ е нанесена на земјата тој ден“, кажа Хоџкинс.

ФБИ досега уапсил повеќе од 535 поединци во врска со упадот во Капитол.