Калифорнија официјално ги забрани детските бракови, откако гувернерот Гевин Њусом потпиша закон за ставање крај на практиката која е сè уште легална во 32 американски сојузни држави. Новиот закон, кој ќе стапи во сила на 1 јануари, наведува дека луѓето мора да имаат 18 години за да стапат во брак во Калифорнија.

„Ова е долгоочекувана мерка за заштита на калифорниските малолетници“, кажа Њусом, кој го потпиша законот заедно со Кортни Стоден, чии родители ѝ дозволиле да се омажи за 50-годишен холивудски актер кога имала само 16 години.

Стоден рече дека ќе продолжи да се бори сè додека децата не бидат заштитени од брак во сите 50 држави. Таа се омажи за актерот Даг Хачинсон во 2011, што предизвика интерес во целиот свет.

Пред околу една деценија, оваа практика сè уште беше дозволена во сите американски сојузни држави. Калифорнија е 18-та што ја забрани од 2018 година.

Во државата немаше законска возраст за стапување во брак, дозволувајќи им на децата да се венчаат ако нивните родители се согласат и судија го одобри бракот. Исто така, немаше механизам за развод на лица под 18 години, а многу девојки велат дека се заробени во насилни и предаторски врски.

„Unchained At Last“, група која се бори за укинување на детските бракови низ САД, соопшти дека околу 9.000 малолетнички се мажат секоја година во Калифорнија и дека речиси сите детски бракови вклучуваат девојки со возрасни мажи.