Еден од осомничените за вооружениот грабеж на Ким Кардашијан изјави дека планира да ја преземе одговорноста за неговата улога во грабежот од висок профил во 2016 и дека ќе се извини на суд кога утре судењето ќе започне во Париз. Јунис Абас (71), кој јавно го призна своето учество во грабежот, е меѓу 10-те осомничени обвинети меѓу другото и за вооружен грабеж и киднапирање.

„Ќе се извинам“, изјави Абас за Асошиетед прес. „Искрено го мислам тоа“.

Кардашијан (44) се очекува лично да сведочи на судењето закажано да се одвива до 23 мај. Во интервјуата и во реалното ТВ шоу на нејзиното семејство, таа рече дека била преплашена кога разбојниците ѝ впериле пиштол за да украдат накит вреден милиони долари во стан каде што престојувала за модната недела во Париз. Таа рече дека мислела оти ќе биде силувана и убиена.

Кардашијан (44) се очекува лично да сведочи на судењето закажано да се одвива до 23 мај. (Фото: АП)

Абас рече дека дејствувал како набљудувач на рецепцијата на приземјето, осигурувајќи дека патот за бегство е чист. Тој рече дека бил невооружен и дека лично не ѝ се заканувал на Кардашијан, но признал дека ја дели одговорноста за злосторството. Тој беше уапсен во јануари 2017 и помина 21 месец в затвор пред да биде ослободен под судски надзор. Во 2021, тој беше коавтор на книга на француски јазик со наслов „Ја конфискував Ким Кардашијан“.

Инспекторите пронајдоа ДНК на Абас на пластичните врвци користени за врзување на рацете на рецепционерот. Запрашан за траумата што ја претрпе Кардашијан, Абас рече: „Точно е, не размислував за тоа. Сфаќам дека затоа што не сум ја брутализирал самата… Не се обвинував себеси во врска со овој аспект, а сепак јас сум одговорен и за тоа“.

Според Абас, неколку минути по почетокот на рацијата, неговите соучесници слегле од станот на Кардашијан и му дале торба со накит. Додека со велосипед бегал од местото на настанот, видел полициски автомобил, но полицајците уште не биле свесни за грабежот. Абас рече дека додека го возел велосипедот, чантата со накитот се заглавила во предното тркало и тој паднал на земја, истурајќи ја содржината на чантата.

„Го зедов накитот и заминав“, рече тој.

Следното утро, минувач нашол крст обложен со дијаманти на улица и го предал на полицијата. Тоа беше единствениот скапоцен камен од грабежот што беше пронајден. Францускиот суд процени дека украдените предмети се вредни вкупно 6 милиони долари.

Абас рече дека не го знаел идентитетот на Кардашијан во моментот на грабежот.

„Ми кажаа за позната личност, сопруга на рапер. Тоа се сите информации што ги имав“, рече тој. „До следното утро, кога слушнав на телевизија за инфлуенсерката. Тогаш разбрав која е таа“.

Тој рече дека ќе ја објасни својата улога за време на судењето, кое ќе се води со порота, постапка во Франција резервирана за најтешките кривични дела – но сепак нема да ги осуди своите соучесници.

„Јас сум само аутсајдер. Не сум тој што го смислил случајот. Јас го преземам мојот дел од одговорноста“, рече тој.

Повеќето од осомничените негираа вмешаност, освен Абас и уште еден човек чија ДНК, исто така, беше пронајдена на местото на настанот.