Доналд Трамп го предупреди Тајван да не прогласува формална независност, откако во изминатите два дена имаше неколку средби со кинескиот претседател Шји Џинпинг.

„Не барам некој да стане независен“, изјави американскиот претседател за „Фокс њуз“ по неговиот дводневен самит во Пекинг.

Тајванскиот претседател Лаи Чинг-те претходно изјави дека Тајван не треба да прогласи формална независност бидејќи веќе се смета себеси за суверена нација. САД долго време го поддржуваат Тајван и се обврзани со закон да му обезбедат средства за самоодбрана.

Трамп изјави дека „не презел никаква обврска“ во врска со самоуправниот остров, кој Кина го смета за своја територија и не ја исклучи можноста за негово земање со сила. Утврдената позиција на Вашингтон е дека не ја поддржува независноста на Тајван, а континуираните врски со Пекинг зависат од неговото прифаќање дека постои само една кинеска влада.

Многумина Тајванци се сметаат себеси за дел од посебна нација, иако повеќето се за одржување на статус кво, во кое Тајван нема да прогласи независност од Кина, ниту ќе се обедини со неа.

На враќањето за Вашингтон, Трамп им кажа на новинарите дека тој и Шји разговарале многу за островот, но дека одбил да разговара за тоа дали САД ќе го бранат.

„Би требало да патуваме 15.000 километри за да водиме војна. Не го сакам тоа. Сакам да се смират. Сакам Кина да се смири“, рече Трамп.

За време на средбата со Трамп, Шји предупредил дека Тајван е најважното прашање во американско-кинеските односи и дека лошото управување со ова прашање може да доведе до конфликт помеѓу двете земји.

„Мислам дека сме во ред. Мислам дека Шји не сака војна“, реагираше Трамп на ова.