Доналд Трамп изјави дека неговите гласачи не се насилни откако се појави на своето избирачко место во Палм Бич, Флорида, при што го придружуваше сопругата Меланија.

„Не морам да им кажувам на моите поддржувачи дека нема да има насилство. Се разбира дека нема да има. Моите поддржувачи не се насилни луѓе, тие луѓе не веруваат во насилство. И јас не сакам никакво насилство“, изјави Трамп.

Бившиот претседател претходно најави дека ќе се обиде да се бори против секој пораз, како што направи во 2020.

Тој не верува дека некој од кандидатите ќе ги освои потребните 270 електорски гласови до крајот на гласањето.

„Тоа нема да се случи, но многу сум самоуверен. Почестен сум што редиците за гласање се долги. Ова е најдобрата кампања“, рече Трамп.

Камала Харис им кажа на медиумите дека гласала по пошта минатата недела.