Добитничката на Нобеловата награда за мир, Наргес Мохамади, во своите сведоштва тајно изнесени од затвор во Иран, ја опишува тортурата на самицата и систематското здравствено занемарување со кое се соочува во затворскиот систем. Мохамади во моментов се наоѓа во критична состојба во болница во градот Занџан. Нејзините записи, кои наскоро ќе бидат објавени во форма на мемоари, откриваат детали за тепања, постојани испрашувања и долги периоди поминати во изолација во текот на нејзините бројни затворања во последната деценија.
Таа пишува дека нема поголема тешкотија од болеста комбинирана со затворска казна. Според нејзините зборови, на авторитарните режими не им е секогаш потребно јаже за егзекуција, туку понекогаш само чекаат човечкото тело самото да престане да функционира. Здравјето на активистката се влошило драстично оваа година, при што нејзината тежина опаднала за повеќе од 20 килограми. Во март била пронајдена во бесвесна состојба во нејзината ќелија по веројатен срцев удар. Барањата на нејзиното семејство и на лекарите таа да добие соодветен третман од нејзиниот тим хирурзи во Техеран биле постојано одбивани.
Семејството на Мохамади смета дека нејзиното понатамошно задржување во притвор и одбивањето на соодветна медицинска нега претставуваат еден вид бавно погубување. Во текот на затворските денови, таа преживеала пулмонална емболија, напади, повеќе инфекции и силни болки во градите, при што честопати морала долго да чека за несоодветна медицинска грижа.
Записите биле изнесувани од озлогласените затвори Евин, Карчак и Занџан со помош на други затвореници и посетители, кои се изложиле на голем ризик за сопствената безбедност. Текстовите морале да бидат препишувани по неколку пати во изминатите десет години, откако страниците или тетратките биле откривани и уништувани од затворските чувари.
Мемоарите насловени „Жената никогаш не престанува да се бори“ треба да бидат објавени во септември. Книгата го опфаќа нејзиниот живот, влијанието на нејзините родители врз политичките убедувања и долгогодишниот активизам за правата на жените. Мохамади досега била апсена 14 пати поради нејзината борба за подобрување на условите во затворите и укинување на смртната казна. Севкупно, таа е осудена на 44 години затвор и 154 удари со камшик низ серија пресуди. Нобеловата награда за мир ја доби во 2023 година додека веќе беше во затвор, во периодот на масовните протести во Иран. Иако кон крајот на 2024 година беше привремено пуштена на слобода поради здравствени причини, таа беше повторно уапсена по една година и во февруари оваа година беше осудена на дополнителна затворска казна.
