Британскиот парламент го одложи гласањето за последниот договор за брегзит, што е нов пораз на премиерот Борис Џонсон.
Место да го поддржат планот на Џонсон, кој деновиве доби зелено светло и од Европската Унија, пратениците со 16 гласови разлика го прифатија амандманот на групата предводена од Оливер Летвин, со кој се бара прво да се усвои законска рамка за спроведување на договорот. Џонсон изјави дека не е уплашен и разочаран од последниот пораз и најави дека следната недела ќе ја стави на гласање легислативата за брегзит.
Иако беше дециден дека Велика Британија ќе излезе од ЕУ на 31 октомври, ова би можело да значи ново одложување.
„Нема да преговарам со ЕУ за ново одложување, ниту законот ме присилува да го направам тоа“, кажа Џонсон.
Британија и Европска Унија завчера постигнаа договор за брегзит, но тој треба да биде одобрен од британскиот и од Европскиот парламент.
