Новородено бебе и неговата мајка се спасени од урнатините во Турција, околу 90 часа по првиот силен земјотрес во понеделникот. Јагиз, момче старо само десет дена, бил извлечен од уништена зграда во тешко погодената провинција Хатај. Спасувачите и локалните медиуми го опишаа овој момент како чудо.

Надежите за наоѓање уште преживеани во Турција и Сирија сè повеќе се намалуваат, најмногу поради смрзнувачките температури.

Замотан во термо ќебе, малиот Јагиз бил префрлен во амбуланта, додека мајка му била изнесена на носилки. Нема нови информации за нивната состојба. Градоначалникот на Истанбул, Екрем Имамоглу, објави на Твитер дека чудесното спасување се случило во градот Самандаг.

Во земјотресот со јачина од 7,8 степени загинаа речиси 22.000 луѓе, но непознато е уште колку луѓе има под урнатините.