Претседателот на САД Доналд Трамп рече дека постојат неколку опции за деескалација по воената операција на САД во Иран, која почна утрово заедно со Израел.
„Можам да одам на долг рок и да ја преземам целата работа, или да ја завршам за два или три дена и да им кажам на Иранците: „Се гледаме повторно за неколку години ако започнете со обнова на вашата нуклеарна програма“, изјави тој за Аксиос.
Ова е првпат американскиот претседател да коментира за операцијата „Епски бес“ откако утринава ги објави нападите. Тој вели дека конечно донел одлука да ги одобри нападите поради недостатокот на напредок во нуклеарните преговори изминатава недела.
„Иранците се приближија, а потоа се повлекоа – се приближија, а потоа се повлекоа. Од тоа разбрав дека тие навистина не сакаат договор“, вели тој, според американскиот медиум, кој вели дека разговарале со Трамп пет минути по телефон.
Израелскиот премиер Бенјамин Нетанјаху кажа дека Израел и САД го убиле врховниот лидер на Иран, ајатолахот Али Хамнеи, и ги повика Иранците да „излезат на улиците и да ја завршат работата“.
„Постојат сè повеќе знаци дека тиранинот повеќе не е жив“, рече Нетанјаху без експлицитно да ја потврди неговата смрт. Тој рече дека комплексот на Хамнеи е уништен, а командантите на Револуционерната гарда и високите нуклеарни функционери се убиени.
