Унгарскиот премиер во заминување Виктор Орбан кажа дека нема да биде пратеник во парламентот откако неговата партија Фидес доживеа тежок пораз на неодамнешните избори.

„Сега не сум потребен во парламентот, туку во реорганизацијата на патриотското движење“, рече Орбан.

Фидес освои само 52 пратенички места на изборите на 12 април, но Орбан кажа дека ќе го отстапи својот мандат на друг. Тиса, предводена од Петер Маѓар, ќе има двотретинско мнозинство во новиот парламент, што ќе ѝ даде можност да ги преобликува домашните политики на Унгарија и нејзините глобални односи.

„Мандатот што го добив како водечки кандидат на листата Фидес-КДНП е, всушност, парламентарен мандат на Фидес. Поради оваа причина, решив да го вратам“, рече 62-годишниот Орбан.

Тој првпат беше избран за пратеник во 1990, а од 2010 ја водеше Унгарија како премиер. Судбината на Орбан како лидер на Фидес ќе биде одлучена на партиска конференција во јуни.