Авион на Пакистанскиот национален авиопревозник (ПИА) се урна во близина на аеродромот во Карачи, објавија државните медиуми. Официјални лица потврдија дека во авионот „ербас А320“ имало 99 патници и осум членови на екипажот и дека тој паднал во населена област. Снимките од местото на несреќата покажуваат густ црн чад.

„Авион на ПИА кој летал на релацијата Лахоре-Карачи се урна непосредно пред слетувањето на аеродромот во Карачи“, објави Радио Пакистан.

Локалните медиуми објавија дека авионот паднал во густо населена област и дека има оштетени куќи, додека пакистанската војска веднаш испрати свои сили на местото на несреќата. Засега не е познато дали има преживеани.

Ова е четврта авионска несреќа во Пакистан во последните десет години, а најтешка беше онаа во 2010 година, кога загинаа 152 луѓе.