Лекарите го промениле начинот на лекување на папата Фрањо, кој има инфекција на дишниот систем, за да се справат со „сложена клиничка ситуација“. Тој ќе остане во болница колку што е потребно, соопшти Ватикан.

Осумдесет и осумгодишниот поглавар на Римокатоличката црква страда од респираторна инфекција повеќе од една недела и беше примен во римската болница „Џемели“ во петокот.

„Резултатите од тестирањата спроведени во изминатите денови и денеска покажаа полимикробна инфекција на дишниот систем, што бара дополнителна промена на терапијата. Сите тестови направени досега укажуваат на сложена клиничка ситуација, што бара соодветен болнички престој“, соопшти Ватикан.

Портпаролот на Ватикан Матео Бруни изјави дека папата е во добро расположение, но не откри дали страда од вирусна или бактериска инфекција. Од Ватикан сугерираа дека тој не е приклучен на респиратор.

Фрањо, кој беше избран за папа во 2013, имаше грип и други здравствени проблеми повеќепати во изминатите две години.