Петнаесетгодишно девојче од Скопје се обидело да се самоубие зашто татко ѝ подолг временски период психички и физички ги малтретирал нејзе,  18-годишната сестра и мајка им.

Основното јавно обвинителство Скопје против 56-годишниот татко поведе постапка за кривично дело Загрозување на сигурноста од член 144 став 3 во врска со став 2 и став 1 од Кривичниот законик.

„Осомничениот подолг временски период психички и физички ја малтретирал сопругата и нивните две деца на возраст од 18 и 15 години. Иако постојано манифестирал агресивно однесување, домашните од страв не го пријавувале, сè додека 15-годишната ќерка, неможејќи да ги издржи заканите, навредите и притисокот од таткото, се обидела да си го одземе животот“, соопшти Обвинителството.

Постапка е поведена и против 33-годишен скопјанец, кој при вршење семејно насилство телесно ја повредил сопругата.

„На 20 јуни, во возило ја влечел и ѝ се заканувал на жената, а во еден момент сакал да ја удри со стаклено шише. Оштетената во возење ја отворила вратата и скокнала од возилото, а осомничениот застанал и се обидел на сила пак да ја внесе внатре. На жената ѝ нанел телесна повреда, што е казниво според член 130 став 2 во врска со став 1 од Кривичниот законик“, вели Обвинителството.

Во двата одвоени случаи на семејно насилство, јавниот обвинител до судијата на претходна постапка доставил предлог за определување повеќе мерки на претпазливост меѓу кои: забрана на осомничените да го напуштаат живеалиштето, обврска да се јавуваат во судот, привремено одземање на патните исправи, забрана за приближување или воспоставување, односно одржување контакти или врски со оштетените и забрана за посетување на локациите каде тие се движат.