Пилот на авион на „Флајдубаи“, кој летал од Обединетите Арапски Емирати до Израел, избол друг пилот, а потоа очигледно се обидел да го сруши авионот со околу 170 лица, изјави израелскиот премиер Бенјамин Нетанјаху. Патниците и екипажот го совладале напаѓачот, а авионот безбедно слета во Саудиска Арабија.
Додека патниците врескале, авионот испратил сигнали за итна тревога и нагло се спуштил илјадници метри. Израел кренал воени авиони поради загриженост за можно киднапирање.
„Додека авионот понирал, еден патник и еден член на екипажот влегле во пилотската кабина. Други членови на екипажот потоа го презеле управувањето со авионот“, изјави Нетанјаху, повикувајќи се на патник со кого разговарал.
Засега не е јасно што го мотивирало нападот. Израелскиот министер за одбрана Израел Кац изјави дека првичните индиции укажуваат на тоа дека еден од пилотите имал намера да го урне авионот и да ги убие сите во него. Тој го опиша инцидентот како обид за џихадистички терористички напад.
„Оние што интервенираа спасија многу животи и спречија голема катастрофа“, изјави Нетанјаху, додавајќи дека Саудиска Арабија го уапсила пилотот, за кого се вели дека е државјанин на Оман.
Капетанот и копилотот на авионот се повредени, соопшти меѓународниот аеродром „Принц Султан бин Абдулазиз“ во Табук, каде што слета авионот.
Авионот бил пренасочен кон Саудиска Арабија откако од јорданскиот воздушен простор биле испратени сигнали за тревога по тепачка помеѓу пилотите, изјави еден израелски функционер. Податоците од авионот покажуваат дека тој ненадејно се спуштил за речиси 4.200 метри за помалку од 30 секунди пред првиот сигнал за вонредна состојба.
Патниците од авионот се превезени со друг авион на „Флајдубаи“ до Тел Авив.
