Пламен Николов од Има таков народ е кандидат за нов премиер на Бугарија и претседателот Румен Радев денеска му го додели мандатот за составување влада. Четириесет и четиригодишниот Николов е бизнисмен кој на последните парламентарни избори беше избран за пратеник.

„Луѓето кои гласаа за вас очекуваат да се промени пропаднатиот корупциски модел на власта. Време е да се открие како и со кои луѓе. Се насобраа толку многу неодложни проблеми и верувам дека сте свесни за тоа. Бугарите се во очекување на вашите предлози за состав на новата влада“, изјави Радев.

Има таков народ доби шанса да формира влада и по изборите на 4 април, но тогаш беше втора политичка сила во државата, па се откажа. Со исклучок на ГЕРБ, сите останати парламентарни партии се во игра да коалицираат со Има таков народ.