Советникот на Кремљ за надворешна политика Јури Ушаков го отфрли американско-украинскиот предлог за 30-дневно примирје, велејќи дека тоа би бил само привремен одмор за украинската војска што би ѝ дал шанса да се прегрупира.

„Русија бара долгорочно мировно решение за Украина кое би ги зело предвид интересите и грижите на Москва. Предложеното примирје е ништо повеќе од привремен одмор за украинските сили. На никого не му требаат чекори со кои само се имитира мир“, кажа Ушаков, кој телефонски разговарал со американскиот советник за национална безбедност Мајк Волц.

Тој додаде дека членството на Украина во НАТО не доаѓа предвид и тоа е нешто за што нема да се разговара во контекст на решавањето на војната.

„Се надеваме дека САД ќе ги земат предвид нашите барања“, рече Ушаков.

Ова е прва реакција од Кремљ откако високите американски и украински делегации разговараа во Саудиска Арабија оваа недела, каде што Украина прифати 30-дневно примирје. Државниот секретар на САД Марко Рубио кажа дека топката сега е во дворот на Русија, каде што денеска пристигна специјалниот претставник на Доналд Трамп, Стив Виткоф.

Портпаролот на Кремљ, Дмитри Песков, утрово изјави дека Владимир Путин би можел да се огласи за предлогот за примирје по неговата денешна средба со белорускиот претседател Александар Лукашенко.