Шефот на европскиот оддел на Меѓународниот совет на аеродроми (АЦИ), Штефан Шулте, изјави дека новиот дигитален систем за гранична контрола на Европска Унија му задава многу главоболки.

Системот за влез и излез (ЕЕС), воведен во април оваа година, бара од патниците кои не се од ЕУ да регистрираат биометриски податоци при патување во земјите од Шенген зоната. Иако ЕЕС работи добро во некои земји, тој исто така предизвикува редици и значителни одложувања на бројни аеродроми, поради што дури се пропуштаат летови.

„Политичарите треба да престанат да се преправаат дека ЕЕС работи сосема добро. Не е така. Патниците чекаат во редица со часови во шпицот на сообраќајот и не знам како ќе се справиме во наредните недели со очекуваното зголемување на сообраќајот“, кажа Шулте.

Системот ги обврзува патниците надвор од ЕУ да бидат фотографирани и да оставаат отпечатоци од прсти, што потоа се проверува секој пат кога влегуваат во Шенген зоната и излегуваат од неа.

„Итно ни е потребна целосна флексибилност за да можат граничните власти да го суспендираат ЕЕС секогаш кога е потребно за да се избегне понатамошен хаос, заедно со преиспитување на тие процеси. Станува збор за покажување почит и пристојност кон оние кои избраа да патуваат во ЕУ и за заштита на нашиот углед како добредојдена и ефикасна дестинација“, вели Шулте.

Европската комисија дозволува ЕЕС да биде суспендиран во некои околности до септември.