Фрауке Петри, еден од лидерите на десничарската Алијанса за Германија (АФД), најави заминување од партијата, само два дена откако таа постигна одличен резултат на парламентарните избори, освојувајќи 13% од гласовите.

„Јасно е дека ќе го направам овој чекор“, изјави Петри, не потенцирајќи кога точно ќе се случи тоа.

Своевремено заштитно лице на партијата, таа падна во сенка на Александер Гауланд и на Алис Вајдел, кои беа промовирани во главни кандидати на изборите, што беше сфатено како внатрешен судир помеѓу крајната десница и помодерната фракција.

Петри ја критикуваше расистичката реторика на водството на партијата, сметајќи дека тоа ги одбива конзервативните гласачи.

Освен Петри, партијата ја напуштаат уште тројца видни членови, вклучувајќи го и нејзиниот сопруг Маркус Прецел.