Русија довела 20.000-25.000 војници во обид да го освои стратешки важниот град Часив Јар во источна Украина, вели украинската војска, признавајќи дека ситуацијата е тешка.

Украина има целосна контрола врз реонот на Часив Јар, кој е сместен на висорамнина во делумно окупираниот регион Доњецк, но заповедниците на украинската војска кажаа дека Русија сака да го освои до 9 мај, кога се одбележува Денот на победата над фашизмот во Втората светска војна. Падот на Часив Јар би ги доближил руските сили до Краматорск и Славјанск, последните големи украински упоришта во Доњецк.

„Ситуацијата околу градот е тешка, но под контрола. Нашите бранители добиваат засилување. Околу 25.000 руски војници се обидуваат да упаднат во Часив Јар и во околните населби“, изјави портпаролот на источната команда на украинската војска, Назар Волошин.

Додека руската војска постепено напредува на источниот фронт, Украина чека добри вести од Вашингтон. По неколкумесечните блокади, нацрт-законот за помош на Украина од 61 милијарда долари во саботата беше изгласан во Претставничкиот дом и денеска ќе се најде во Сенатот, каде што веќе беше одобрен во февруари. Претседателот Џо Бајден кажа дека веднаш потоа ќе го потпише со цел неопходните нови залихи на оружје и муниција што побрзо да стигнат на бојното поле во Украина.

Украинските желби не се тајна: артилериски гранати и противвоздушна одбрана, што за првпат треба да ги вклучи системите со долг дострел „АТАЦМС“, со кои можат да се напаѓаат цели оддалечени до 165 километри.