Руското министерство за одбрана е во процес на купување на милиони ракети и гранати од Северна Кореја за војната во Украина, велат американски разузнавачи.

„Фактот дека Русија бара помош од изолираната Северна Кореја покажува дека руската војска продолжува да страда од сериозен недостиг на залихи во Украина, делумно и како резултат на санкции и контрола на извозот“, изјави еден американски функционер кој побара да остане анонимен.

Американските разузнавачи веруваат дека Русија во иднина ќе се обиде да обезбеди и дополнителна воена опрема од Северна Кореја.

Извештајот, што прв го објави „Њујорк тајмс“, следува откако администрацијата на Џо Бајден неодамна потврди дека руската војска минатиот месец добила дронови од иранско производство за потребите на војната во Украина. Станува збор за дронови од типот „мохаџер-6“ и „шахед“.

Северна Кореја, која ја призна независноста на самопрогласените народни републики Доњецк и Луганск, се обидува да ги зацврсти своите односи со Русија и Кина, при што ги обвини САД за украинската криза. Евентуалните испораки на севернокорејското оружје на Русија би биле прекршување на резолуции на ОН со кои земјата има забрана за извоз и увоз на оружје.