Руските и сепаратистичките сили целосно го контролираат Лисичанск, објави руското министерство за одбрана. Ова следува откако Москва утрово кажа дека градот е опколен и во него се водат борби.

„Министерот за одбрана го информираше претседателот Владимир Путин дека целиот регион Луганск сега е ослободен“, објави министерството.

Освојувањето на Луганск и Доњецк, двата региона кои го сочинуваат Донбас, стана главниот фокус на инвазијата на Украина, откако руските сили се повлекоа од Киев и северот на земјата.

Во изминатите недели, офанзивата беше насочена кон соседните градови Северодоњецк и Лисичанск, кои беа последните упоришта на украинските сили во Луганск. Русите исто така контролираат половина од Доњецк.